Fimmtudaginn 3. maí kom Gísli Guðmundsson, lögregluvarðstjóri, í heimsókn til okkar. Með í för var Lúlli lögreglubangsi og ræddi Gísli við yngsta stigið og leikskólann um almennar öryggisreglur varðandi endurskinsmerki og hjálma. Fengu þau lika að kíkja á lögreglubílinn og var það auðvitað mjög gaman. Þá hitti hann einnig elsta stigið og spjallaði hann við þau m.a. um öryggi við dráttarvélar. (Myndir)

Þriðjudaginn 24. apríl mætti Hannes Ellertsson bankastjóri Landsbankans á Akranesi og afhenti 9.b viðurkenningar fyrir sigurinn i Raunveruleiknum.  Fengu þau farandbikar til varðveislu í eitt ár og svo viðurkenningarskjöl og tíuþúsund króna gjafabréf í Skemmtigarðinn í Smáralind. Eins og kemur fram í fyrri frétt, er Raunveruleikurinn gagnvirkur fjármálaleikur og miðað við árangur þeirra verða þau í góðum málum í framtíðinni. (Myndir)

Eftir skóla í fag, föstudaginn 13., var nemendum 9. og 10. bekkja troðið inn í bílinn hennar Höllu. Þau voru sum með ótrúlega mikinn farangur og þurftu því að sitja með töskur í fangi og undir fótum. Tilgangur ferðalagsins er smiðjudagar sem eru núna á Kleppjárnsreykjum. Þarna eru  nemendur úr Borgarfirði og Reykhólum auk okkar, svona 70-80 stykki. Þau geta valið úr nokkrum smiðjum,s.s. körfubolta, tónlist, vísinda og tilraunasmiðju, skartgripagerð, reiðtygjasmíði og matargerð. Ársæll og Ragnar voru svo heppnir að komast í reiðtygjasmíði og sitja meðan þetta er skrifað, sveittir við að flétta tauma. Skvísurnar 4 eru hins vegar að gera sér skartgripi og munu vafalaust skarta þeim á þriðjudaginn þegar "Dansað í Dölum" ballið verður. Matargerðarhópurinn er að undirbúa veislu í mexikönskum stíl og leggur ilminn um allan skólann. (Myndir)